Un total de 30 emigrantes participaron nos cursos de alfabetización dixital da Coruña e Betanzos

Co obxectivo de familiarizar aos inmigrantes nos usos e costumes da Sociedade da Información e non facer que os problemas de inclusión sexan máis grandes do que son, A Coruña e Betanzos acolleron os días pasados unha serie de actividades formativas de alfabetización informática. As accións, organizadas por Emigración, veñen de chegar ao seu remate logo de achegar coñecementos dixitais a un total de 30 participantes.
Aos actos de clausura e entrega de diplomas asistiu o director-xerente da Fundación Galicia Emigración, José Manuel Castelao Bragaña, que estivo acompañado, en Betanzos, pola concelleira delegada en Sanidade, Servizos Sociais, Emigración e Xuventude do Concello de Betanzos, Mª. Jesús Teijo Antelo.
A iniciativa, que incluíu 25 horas lectivas e foi de balde, abrangueu cuestións básicas como o manexo dun computador, a procura e xestión da información ou o emprego de ferramentas informáticas como as aplicacións de ofimática. Asemade, aprendéuselles aos alumnos nocións fundamentais sobre redacción de textos ou traballos con táboas.