A USC colabora activamente co novo centro europeo de investigación en física nuclear

O profesor da USC, José Benlliure, do Departamento de Física de Partículas da entidade académica, vai a ser o encargado de coordinar o equipo de científicos españois escollidos para participar activamente no novo centro europeo de investigación en física nuclear (FAIR), que se emprazará na cidade alemá de Darmstadt.
Este centro xorde para dar resposta, segundo informan dende a Universidade, a preguntas tan fundamentais como “cal é a orixe da masa da materia ou onde e como se crean no Universo os elementos químicos presentes na Terra”, así como para entender a menos coñecida das catro interaccións fundamentais presentes no noso Universo: a interacción forte.
Asemade, permitirá desenvolver aplicacións no campo da física médica, a enerxía ou os novos materiais, entre outras cousas.
No programa científico do FAIR participan 2.500 investigadores de todo o mundo, dos cales, o profesor Benlliure coordina a máis de 120 científicos procedentes de dez Universidades de todo o país (Autónoma e Complutense de Madrid, Granada, Huelva, Politécnica de Barcelona, Salamanca, Santiago, Sevilla, Valencia e Vigo), tres institutos do Consello Superior de Investigacións Científicas (o de Física Corpuscular de Valencia e os de Estrutura da Materia e de Matemáticas e Física Fundamental de Madrid) e do Centro de Investigacións Enerxéticas, Tecnolóxicas e Ambientais.
Dende a Universidade compostelá tamén destacan a participación dunha vintena de investigadores do Grupo Experimental de Núcleos e Partículas pertencente ao Instituto Galego de Altas Enerxías da Universidade de Santiago de Compostela e cinco da Escola Técnica Superior de Enxeñeiros de Vigo.
Estes dous grupos, segundo apuntan, “contribúen activamente a este proxecto en colaboración con empresas galegas liderando tarefas de deseño e construción de detectores de partículas que serán unha parte importante dos experimentos que alí se realizarán”.