Open Green: palestra de innovación sustentable no salón SIMO Network

De entre as cousas que se están a presentar no salón SIMO Network que vén de abrir as súas portas na Feira de Madrid (IFEMA), hai unha que é como o altofalante dende o que se canalizan unha boa parte dos achados e as innovacións. Falamos do Open Green, un recinto de traballo en liña que está a acoller encontros, concursos, demostracións, presentacións, relatorios, obradoiros e labores de consultoría personalizada. O espazo, que está promovido pola Escola de Organización Industrial, vén a ser algo así como a canle que materializa todo o que de sustentable ten a nova tecnoloxía e todo o que de tecnolóxico ten o coñecemento sustentable. Polo tanto, sinalan os promotores, o recinto fai honra ao seu nome, e ademais serve para incorporar as tendencias dixitais de vangarda nas empresas e axudalas a ser máis competitivas.
O escenario Open Green foi visitado polo alcalde de Madrid, Alberto Ruíz Gallardón, polo presidente do IFEMA, José María Álvarez del Manzano e máis polo secretario de Estado de Telecomunicacións, Bernardo Lorenzo.
Na xornada de apertura, María Fanjul (de StepOne), Enrique Domínguez (de Dialcom) e José María López (de Nextel) afondaron na potencialidade estatal no estranxeiro, perfectamente capacitada para adaptarse a situacións do máis variado, sinalaron. Tamén interveu no Open Green Carlos Barrabes, director de Barrabes.biz, quen sinalou como “fundamentos de toda innovación a posta en marcha dun bo produto e a capacidade de medre da empresa en base ao valor diferencial e á aposta polo talento”.