Ineo desvelou en Vigo as claves da innovación en tempos de crise

INEO, asociación de referencia en novas tecnoloxías con máis de 80 empresas asociadas, vén de celebrar, esta mesma mañá en Vigo, un almorzo de traballo baixo o título Innovación en tempos de crise. O formato da xornada, a modo de debate aberto entre os participantes, permitiu que os asistentes formularan cuestións de interese en torno ao tema da innovación e que lles afectan directamente ás súas empresas.
O obxectivo deste evento era poñer en valor as oportunidades que a innovación lle ofrece ás pequenas e medianas empresas de calquera sector produtivo, “para fortalecerse e facer fronte á actual crise económica”. Tal e como se falou no debate, estas empresas “deben perder o medo a innovar e deben ser conscientes tamén da importancia de desenvolver boas ideas rompendo coa tendencia actual a elaborar proxectos adaptados ás convocatorias que presentan os organismos europeos”.
Estas e outras cuestións de interese xurdiron a partir das dúbidas plantexadas polas empresas do sector TIC asociadas a Ineo que participaron na xornada. Como experto en innovación a nível europeo, o almorzo contou coa participación de Andrea Rossi, director da unidade de Innovación dunha compañía internacional de servizos de Tecnoloxías da Información (TI) e destacado especialista en proxectos empresariais de innovación a nivel europeo.
Por outra parte, e en representación dun dos mais importantes centros tecnolóxicos de Galicia, participou tamén no evento Luis Álvarez Sestelo, administrador Xeral de GRADIANT, entidade de cuio patronato forma parte Ineo. Tamén asistiu a Directora Xeral de Ineo, Lucía Gregorio.
O almorzo de traballo estivo financiado polo IGAPE (Instituto Galego de Promoción Económica) entidade dependente da Consellería de Economía e Industria da Xunta de Galicia.