BNG e PP dan boa acollida á sentencia europea contra o canon dixital

Tal e como falamos onte, o Tribunal de Xustiza da Unión Europea vén de determinar ilegal o canon dixital español para empresa e profesionais, imposto a tódolos materiais de reprodución e non só aos que en potencia se vaian encamiñar á copia privada. A medida, con toda a repercusión que ten para o xeito en que o coñecemento flúe e sen comparte, xa foi avaliada en detalle polos partidos políticos opostos ao canon. Para o Bloque Nacionalista Galego, a valoración é a todas luces positiva. Así nolo fixo saber o senador Xosé Manuel Pérez Bouza: “Trátase dunha boa nova que dá resposta a unha inxustiza, que é a de cobrar por adiantado un cano ás administracións e ás empresas”.
O senador nacionalista emprazou ao Goberno, en particular á ministra de Cultura, González Sinde, a tomar nota da sentenza da UE e proceder a introducir canto antes as modificacións lexislativas precisas para deixar sen efecto o cobro do canon. “Agardamos que a ministra emende a inxusta situación creada con este tema e corrixa a lei”, sinala Pérez Bouza.
A decisión da Unión Europea tamén tivo resposta do Partido Popular, que aproveitou para pedir a supresión inmediata do canon dixital, ao que cualificou de “imposto inxusto”. Para Esteban González Pons, vicesecretario de Comunicación do PP, trátase dunha taxa que vai contra a modernización de España e, perante isto, a Unión Europea recoñeceu o que era obvio.