1.600 horas de formación TIC para os traballadores da xustiza galega

Un total de 1.600 horas de formación. Este é o tempo total das actividades para a mellora dos coñecementos tecnolóxicos dos colectivos xudiciais galegos organizadas pola Secretaría Xeral de Modernización. As accións, celebradas durante 2010, forman parte das liñas do Plan Senda 2014 para a renovación da Xustiza, proceso que abrangue a adaptación aos novos tempos tecnolóxicos dos traballadores desta administración e, por extensión, da cidadanía galega por enteiro. Segundo informa a Xunta, a formación centrouse nas aplicacións para a xestión procesual Minerva Nox, Fortuny, Lexnet, no sistema de rexistro civil Inforreg e nas ferramentas audiovisuais para a gravación de vistas e para establecer videoconferencias.
A taxa de participación nestas actividades formativas TIC foi alén do 96%. O persoal asistente a estas accións salientou de xeito positivo “a calidade” da forma e do fondo do achegado, amais da metodoloxía usada.
Cómpre lembrar que Minerva Nox é o novo sistema de xestión da xustiza galega, e pola súa implicación (incorpora un fondo refundamento do control da información da dito eido administrativo) precisou da posta en marcha de medidas de asesoramento e de aprendizaxe paralelas. As accións diríxense sobre todo a funcionarios do corpo de Xestión, Tramitación e Auxilio, así como xuíces, fiscais e secretarios xudiciais. A día de hoxe xa están mobilizados preto de 600 asistentes para os vindeiros cursos, sendo o obxectivo formar un total de 2.000 profesionais. “Con este plan formativo que remata no primeiro semestre de 2011”, informa a Xunta, “o Goberno galego dálle continuidade á formación que comezou no mes de maio durante o proceso de implantación da dita Minerva Nox”.