A competencia en servizos de telefonía e banda larga está que arde

Normalmente, decembro soe ser o mes máis activo do ano en materia de novas tecnoloxías, dispositivos electrónicos, videoxogos… debido, sobre todo, ás datas que se celebran, que levan a un consumismo esaxerado por parte da gran maioría o que fai que as compañías e empresas do sector se apresuren a sacar dispositivos novos e lanzar ofertas seductoras que lles enchan o ollo aos clientes.
Este ano pasado, malia que a crise estivo asexando moi de preto para evitar que descoidaramos os nosos petos, tamén se cumpriron os patróns, e decembro volveu a ser o mes máis activo en materia de consumo TIC, con cifras que rexistraron récords históricos en portabilidade fixa e móbil, o que ao mesmo tempo demostra que os usuarios miramos cada vez máis as tarifas ofertadas e que a competencia está, literalmente, “que arde”.
Por exemplo, a telefonía móbil sumou en decembro 404.534 novas liñas, unha das cifras máis altas en toda a súa historia e un 34,55 por cento superior á de decembro de 2009.
Por operadoras, Orange foi a que máis liñas logrou captar a través da portabilidade móbil (31.372), seguida de Yoigo (28.257) e as operadoras móbiles virtuais (3.839). Pola súa parte, tiveron un saldo negativo en portabilidade Movistar (que restou 45.585 liñas) e Vodafone (-17.883).
En canto á gañancia total de liñas móbiles, no último trimestre do ano, Orange captou o 46,17 por cento das altas netas; Vodafone o 22,86 por cento; Yoigo, o 18,48; os OMV un 8,2 por cento e Movistar o 4,3 por cento.
Tamén no sector da banda larga, malia a rexistrar en decembro un incremento algo máis leve que no mesmo mes do ano anterior (3,65 por cento menos), o 2010 pechou cun aumento de 816.415 liñas.
Por último, no tocante á telefonía fixa, en decembro rexistráronse 203.000 intercambios, de novo a maior cifra da historia falando de portabilidade fixa (asociada aos cambios de operador de servizos empaquetados que inclúen a voz e a banda larga).