Compostweets sortea dous libros sobre as orixes de Santiago

Santiago de Compostela, como dixemos hai uns días nesta web, vai acoller o vindeiro 26 de febreiro unha xuntanza dirixida a avaliar o emprego que as empresas e os medios de comunicación lles están a facer (e lle poden facer) ás redes sociais, facendo especial fincapé nas posibilidades de Twitter. Estamos a falar do I Encontro Compostweets, a celebrar no Hotel Porta do Camiño a partir das 9.45 horas e dando acubillo a algúns dos máis recoñecidos profesionais do sector da promoción, a publicidade e a comunicación dixital dos eidos galego e estatal. Pois ben, amais da información que xa está a xerar dende a Rede, a cita conta xa cun novo aliciente posto en xogo: o sorteo de dous libros sobre a historia da cidade que lle vai dar acubillo: Santiago.
Falamos de Los orígenes de Compostela, una historia dibujada, de Arturo Franco Taboada (publicado Antilia Edicións). Para participar no dito sorteo, cómpre dar unha serie de pasos: deixar unha mensaxe na páxina do evento (coas razóns da nosa interese polo libro en cuestión), incluírnos na listaxe de amizades da páxina de Facebook de Compostweets, facérmonos seguidores de Compostweets no Twitter e escribir no noso Twitter concurso #compostweets para libro @xanvilar. Os resultados do sorteo faranse públicos o vindeiro 26 de febreiro no propio encontro compostelán.