Educación premia a aposta pola innovación educativa a través das TIC

O conselleiro de Educación e Ordenación Universitaria, Xesús Vázquez Abad, foi o encargado de entregar, hoxe mesmo, os premios da entidade pública que representa á Innovación Educativa para o profesorado de centros educativos non universitarios, que centraron os seus esforzos, basicamente, en aplicar as TIC ás súas metodoloxías de ensino.
En total concedéronse 30 galardóns de entre os 71 proxectos presentados por parte de docentes das etapas de infantil, primaria, secundaria obrigatoria e bacharelato da nosa Comunidade. Este ano a Consellería de Educación, no marco da súa aposta pola calidade do ensino, incrementou a contía dos premios, pasando dos 3.000 aos 6.000 euros.
No acto, celebrado en San Caetano, Vázquez Abad destacou que o esforzo dos premiados para o desenvolvemento da innovación pedagóxica “é unha actitude ética perante a vida que serve de exemplo para todos cantos traballamos en corpo e alma a prol da excelencia educativa”.
O conselleiro engadiu que estas iniciativas demostran “que avanzamos na defensa da eficacia do sistema educativo como pedra angular do benestar social e das políticas de progreso económico e cultural”. Así, destacou o apoio da Consellería de Educación a estas iniciativas, co fin de que acadar a consolidación da mentalidade innovadora “converténdose nunha práctica cotián e institucionalizada que fará das nosas aulas viveiros da intelixencia, pancas de progreso e impulsos de transformación social”.
A convocatoria dos premios deste ano centrouse nos proxectos relacionados co fomento do plurilingüismo e a potenciación das linguas estranxeiras; asi como nos referidos ao uso da tecnoloxías da información e a comunicación (TIC) e a introdución das competencias básicas na aula dixital.
Tamén se centrou nos relacionados coa atención á diversidade e aos materiais e ferramentas de reforzo educativo que favorezan a accesibilidade ao currículo do alumnado con necesidades específicas de apoio educativo.
Con estes premios á innovación educativa a Consellería de Educación valora as experiencias innovadoras que se están a desenvolver nos centros educativos galegos e que supoñen unha mellora da calidade do ensino.