A galega Aldaba fortalece a nube cun innovador sistema de certificación

Se hai unha materia pendente no eido da computación da nube, probablemente esta radique na seguridade. Ou sexa, na posibilidade de levar a cabo todo tipo de operacións na Rede (que é no que consiste a fin de contas a nube), dende trámites a labores de xestión, cun 100% de garantías sobre a privacidade dos nosos datos e da autenticidade das outras persoas que están en liña. Neste punto é onde traballa precisamente a firma galega Aldaba, que en colaboración co Grupo de Tecnoloxías de Información (GTI) da Universidade de Vigo vén de desenvolver un sistema para achegar este nivel de seguridade que se require. O sistema, que é único no ámbito español, será presentado en breve baixo o seguinte nome: www.:SLA@cloud. Esta iniciativa aplica na nube a experiencia de colaboración que en 2007 desenvolveron Aldaba, o GTI de Vigo e máis o CESGA: o proxecto IFEC (Infraestrutura de Firma Electrónica Cualificada).
Con este proxecto, conseguíronse superar os límites que lles son propios aos certificados dixitais de identidade (como por exemplo o eDNI) como métodos para encarnar á persoa que asina. A clave estivo na construción dun sistema estable baseado en certificados dixitais de atributos e selado temporal (timestamps). As aplicacións disto son múltiples e diversas, pero se cadra na nube (co que ten de macrooficina de traballo e comunicación accesible a calquera hora e dende calquera lugar) demandábase especialmente. Segundo nos conta o CESGA, “este sistema senta os alicerces para establecer e controlar con garantías acordos de nivel servizo, SLAs (Service Level Agreements) entre un provedor de infraestruturas de computación na nube e un cliente que demande estes servizos”.
Entre as vantaxes que pon en xogo e que probablemente non achegue ningunha outra plataforma inclúese a súa vertente de recurso universal. É dicir, que se pode aplicar a todo o que se poida demandar na nube en remoto e que requira ou poida requirir un contrato de por medio. De feito, tal e como dixemos ao comezo deste artigo, ata o de agora a garantía en servizos de infraestruturas de computación estaba baseada unicamente na confianza entre o provedor e o usuario, segundo os termos do contrato definidos polos SLAs. Porén, o desenvolvemento de Aldaba pon a solidez desexada no recoñecemento dunha orixe autorizada pola entidade clienta “grazas á incorporación da asignación de certificados de nota de prensa atributos, que establecen o rol que cada usuario xoga no sistema e a capacidade de solicitar determinados servizos segundo as políticas establecidas no acordo”, infórmase.
Co fin de establecer este acordo, déuselle corpo a unha metalinguaxe chamada xSLAml, que serve neste caso para informar das condicións que deben rexer o subministro do servizo do que vai ser obxecto o cliente da infraestrutura na nube.
Apoios
O desenvolvemento faise realidade cos mellores avais: por unha banda os dos axentes que traballaron na súa posta en marcha (que forman parte da vangarda da nosa investigación tecnolóxica e a nosa computación) e pola outra os de entidades como a Secretaría de Estado de Telecomunicacións do Ministerio de Industria. De feito, o proxecto do que estamos a falar forma parte das iniciativas seleccionadas no marco da edición 2009 do Plan Avanza, xa que “promove directamente a participación industrial española na construción da Internet do Futuro, permitindo a unha empresa, ALDABA, en estreita colaboración cun grupo de investigación punteiro dunha universidade, GTI, desenvolver novos produtos e servizos cun elevado compoñente TIC na vangarda da tecnoloxía do Cloud Computing e da Web 2.0 (Internet dos Servizos)”.
A xuízo de José Antonio Castelao, un dos socios de ALDABA, e segundo recolle o CESGA, “a devandita colaboración universidade-empresa-centro tecnolóxico xera un ecosistema idóneo para testar proxectos de investigación, facilitando a transferencia de coñecemento á industria”.
O funcionamento
Segundo informa na súa web a Universidade de Vigo, da que forma parte o Grupo GTI, co www:SLA@cloud garántese a demanda de servizo ao cliente a través dunha lóxica de control baseada no paradigma RBAC para avaliar a solicitude en tempo real e de construír baixo demanda os recursos solicitados, como máquinas virtuais ou espazo de almacenamento. Ademais establecerase un control de calidade asinado dixitalmente con selos temporais para garantir o correcto cumprimento e informar de calquera desviación.