O clásico NBA Jam estréase no iPhone

Na tempada de Nadal sorprendeu este ano a ausencia do xogo de baloncesto de EA Sports (a última hora cancelouse o NBA Elite 11) mentres que o título que estaba considerado coma un complemento descargable do mesmo, NBA Jam, volvía coma xogo independente para as consolas de alta definición, sorprendendo agradablemente por chegar agora para iOS, de xeito xa é posible mercalo na App Store por 3,99 euros.
NBA Jam é todo un clásico das máquinas recreativas nos que os xogadores de baloncesto aparecen de xeito caricaturesco para enfrontarse en partidos de 2 contra 2, realizando impresionantes mates e primando a diversión fronte á simulación propia dos títulos deste deporte que actualmente priman nas consolas de videoxogos.

A edición para iOS de NBA Jam padece das limitacións propias dos controis virtuais na pantalla táctil do iPhone/iPod Touch, pero dado que a precisión non é chave neste tipo de títulos, iso non arruinará a diversión, especialmente se temos en conta que o seu prezo a décima parte do que custa nas súas versións para consolas domésticas, aínda que cómpre precisar que non estamos ante un título completo, senón que moitos dos seus contidos hai que mercalos dentro da aplicación a prezos de entre 0,79 e 2,39 euros.
Estamos ante un xogo imprescindible para os que gozaron do título orixinal en máquinas recreativas, pois logrou trasladar á perfección este título, cuns excelentes gráficos e cos xogadores da NBA actuais (resultando bastante simpático ver ao español Pau Gasol en plan cabezón).