Killzone 3 e Crysis 2 chegan ás redes P2P antes que ás tendas

A piratería sempre fixo moito dano á industria dos videoxogos, pero existe un tipo de ocasións nas que resulta especialmente prexudicial: cando os usuarios que non pagan poden conseguir os xogos antes da súa chegada ás tendas. Isto mesmo vén de pasarlle a 2 dos principais títulos desta tempada, concretamente á versión para PC de Crysis 2 e ao xogo Killzone 3 para PlayStation 3.
No caso de Crysis 2 estamos ante un título moi agardado, que non chegará ás tendas ata dentro de máis dun mes, polo que a filtración dunha copia sen rematar do xogo na rede BitTorrent é un duro pau para Crytek e EA, que tiveron que destacar que a versión que circula na Rede non é a definitiva, pois o xogo aínda está sen rematar, e quéixanse do dano que este tipo de filtración fan á industria dos videoxogos para PC, aínda que tampouco afondan na orixe da copia que está a distribuírse, e que parece incluír tanto o modo campaña coma o multi-xogador (incluíndo a chave mestra para a activación do xogo en liña).
A filtración de copias sen rematar de produtos non só fan que algúns usuarios que poderían reservar ou comprar o produto o día do seu lanzamento non realicen tal investimento, á vez que xera unha falsa imaxe do xogo, pois moitos criticarán o título segundo unha versión de proba, descoñecendo o produto final, que claramente estará máis pulido.

No caso de Killzone 3 a situación sería máis grave non pola antelación (o xogo chegará ás tendas a semana que vén) senón polo feito de que parece tratarse dunha copia completa e final da versión europea do xogo para PlayStation 3, que circula nunha copia de 41,40 Gb na que se inclúe o título co seu modo 3D, á vez que tamén hai copias rippeadas nas que eliminaron tanto o modo 3D como algunha lingua das incluídas no título para deixalo en só 22,3 Gb.
Esta filtración podería afectar seriamente ás vendas, polo mero feito de chegar antes ás redes de intercambio de ficheiros que ás tendas, e coma no caso anterior o máis condenable debería de ser a orixe das filtracións, pois non resulta moi comprensible que profesionais dunha industria sexan os que publiquen as súas estreas antes do seu lanzamento oficial, dinamitando o futuro do sector.