Os enxeñeiros en Informática queren concorrer ás prazas de analista programador da CRTVG

O Colexio Profesional de Enxeñaría en Informática de Galicia (CPEIG) quere un sistema de acceso laboral á CRTVG máis acorde coas demandas dos profesionais aos que representa. Segundo informa o Colexio, o seu presidente (Fernando Suárez) vén de presentar un recurso contra a resolución da Dirección Xeral da CRTVG pola cal se convoca un proceso extraordinario de oferta de emprego que inclúe prazas de analista programador. A xuízo da entidade profesional, cómpre engadir como requirimento fundamental na concorrencia por estas prazas o feito de ser titulada ou titulado en Enxeñaría Técnica en Informática ou en Enxeñaría en Informática.
Estas vacantes foron dadas a coñecer no Diario Oficial de Galicia do pasado 2 de febreiro, onde se dá conta da resolución do 25 de xaneiro da dita Dirección Xeral “pola que se convoca un proceso extraordinario de consolidación de emprego para a provisión de vacantes por persoal laboral fixo na Compañía de Radio-Televisión de Galicia e nas súas sociedades, Televisión de Galicia S.A. e Radiotelevisión Galicia S.A”. No medio de tódolos postos de traballo a cubrir, inclúense catro da analista programador. Tal e como figuran a día de hoxe as esixencias a cumprir para concorrer a estas prazas, sería preciso estar en posesión dun título dun ciclo superior da familia de Informática ou equivalente, ou o título de Bacharelato máis un ano de experiencia. A xuízo do CPEIG, o desenvolvemento deste labor ten que estar garantido por un profesional cunha completa formación no eido tecnolóxico e informático. Cómpre lembrar que un dos cometidos do colexio é velar, precisamente, pola defensa dos intereses dos seus colexiados, amais de “exercer a representación e defensa da profesión ante calquera administración pública, institución, tribunal, entidade e particular, podendo exercitar o dereito de petición conforme á Lei e propoñer cantas reformas lexislativas estime xustas para a defensa da profesión”.