Microsoft alenta á extinción do Internet Explorer 6

Malia que xa hai tempo que se desaconsella o seu uso dende tódalas frontes, semella que aínda hai quen teima en seguir empregando o navegador Internet Explorer 6 de Microsoft. Só así se entende que a propia casa responsable do produto colla o altofalante para pedir dunha vez por todas que, quen o teña, se anime a quitalo do seu computador. “Moi poucas veces pedimos de xeito tan encarecido que deixedes de usar un dos nosos produtos, pero Internet Explorer 6 faremos unha excepción”, di a multinacional nun comunicado en Twitter. A isto hai que engadir a web A conta atrás de Internet Explorer 6, unha páxina que fala por si soa do moito que lle debe amolar Microsoft o feito de que o navegador, tan a contrapelo da Rede social de hoxe, se negue a esmorecer.
O obxectivo é acadar que menos do 1% dos internautas empreguen o devandito programa, que segundo a as máis recentes estatísticas está presente a día de hoxe no 12% dos ordenadores do mundo. Entre os países que máis teiman nel, cómpre salientar a China cun terzo total dos equipos.
A pregunta que nos podemos facer é: que ten este recurso que rematou por converterse nun experimento fallido con teimosía de mala herba? Microsoft, que di que o programa non axuda a optimizarlles o traballo aos desenvolvedores, quere se espallen as versións que viñeron logo, especialmente a 9 (arestora descargable en fase de proba) porque permiten mellor rendemento do hardware e da xestión de recursos, amais de meirande axilidade na carga de páxinas e unha maior adaptación aos estándares web (incluído o HTML 5 na versión recente), cousas nas que o Internet Explorer frouxea, precisamente.