Curso online de xestión de imaxes dixitais

A partir do vindeiro 30 de marzo, e ata o 30 de xuño de 2011, a Universidade Camilo José Cela, con sede en Madrid, vai dar acollida a curso online Experto en xestión de imaxes dixitais, que concederá un título oficial cotexado pola entidade académica.
O curso vai dirixido a aqueles profesionais en activo que precisen actualizar os seus coñecementos, tanto metodolóxicos como tecnolóxicos, para enfrontarse aos problemas que xurdan no tratamento das imaxes dixitais; así como aos titulados e tituladas universitarias que desexen ampliar os seus horizontes laborais.
As persoas interesadas en asistir ao curso, que equivale a 12 créditos, non precisan estar cursando estudos universitarios, porén é recomendable que teñan uns coñecementos mínimos no tratamento de imaxes para non perder o fío das clases e aproveitar ao máximo as exposicións.
O programa inclúe leccións sobre a dixitalización de documentos, a xestión das imaxes na web, a xestión da cor ou a preservación dos fondos dixitais a longo prazo, así como temas relativos aos dereitos de propiedade intelectual e á protección de datos.
A Fundación Tripartita, a través de Docuformacion.com, ofrece a bonificación ao 100 por cen deste e doutros cursos, aos que se pode acceder a través da súa páxina web.