Recoñecemento international a Indra polo seu labor en responsabilidade social

Hitachi Data Systems Corporation (compañía propiedade de Hitachi especializada en tecnoloxías e servizos da información) e máis a española Indra (con forte presenza galega) veñen de ser recoñecidas polo Instituto Ethisphere como empresas exemplares a nivel de ética e responsabilidade social segundo datos mundiais de 2011. Hitachi na categoría de hardware e Indra na modalidade de tecnoloxía aeroespacial. Cómpre lembrar que a entidade que fai estas valoracións elabora de xeito constante seguimentos da actividade das principais corporacións a nivel internacional, buscando sempre aquelas que fagan gala dun “enfoque ético exemplar e un alto nivel de compromiso social”.
Amais de Hitachi e Indra (empresa española especializada en servizos tecnolóxicos para as administracións e os transportes e que conta cun bo número de profesionais galegos e sedes en Narón, Coruña e Santiago), neste paquete de firmas do sector tecnolóxico-dixital con marcada responsabilidade social atopamos (entre outras) a Accenture, Adobe Systems (na categoría de software) ou Avaya (na modalidade de tecnoloxías de telecomunicacións).
Segundo se conta na Rede, este é o quinto ano consecutivo en que Ethisphere achega estes recoñecementos ao labor das empresas do eido internacional. Trátase dun centro de estudos dedicado á creación, promoción e intercambio de mellores prácticas en ética empresarial e responsabilidade social, loita contra a corrupción e sustentabilidade. Para subministrar estas valoracións, Ethisphere avalía cada ano milleiros de compañías e avalía un número sen precedentes de aplicacións a través da súa propia metodoloxía de corrección.