A plataforma GalegoLab, recoñecida polo noso audiovisual

Os recoñecementos ao noso audiovisual da pasada edición dos Premios Mestre Mateo, dados a coñecer xa hai uns días, tiveron de novo un certo sabor tecnolóxico. De feito, case non podía ser doutro xeito, tendo en conta que os camiños do cinema en xeral van cada vez máis preto das novas canles de creación e a comunicación, e que (por outra banda) xa nada se entende nas redes sen formatos claramente audiovisuais. Falamos de linguaxes que, por dicilo dalgunha maneira, non teñen outra alternativa que entenderse. Esta vertente TIC dos premios, convocados pola Academia do Audiovisual, percibiuse no premio á mellor Obra Interactiva, que foi dar á plataforma galegolab.org, plataforma dixital para promover, a través de todo tipo de iniciativas innovadoras, o noso idioma onde máis se bota en falta.
Unha das principais características desta iniciativa, alén da loita polo galego que xorde do seu seo empregando as máis diferentes canles tecnolóxicas, é o feito de que fai uso da metodoloxía do crowdsourcing, circunstancia moi valorada polo xurado dos Mestre Mateo polo que ten de actividade social, participativa e aberta a todo tipo de propostas, ben sexan procedentes de membros da plataforma ou de outros colectivos.
A web foi posta en marcha en maio de 2010, e ao longo da súa andaina xa foi obxecto de recoñecementos previos, un deles da man da Secretaría Xeral de Modernización, que valorou a importancia do proxecto para o desenvolvemento de contidos en Internet que favorecen a preservación e promoción nas redes do noso patrimonio.
Volvendo aos Premios Mestre Mateo e a categoría de Obra Interactiva, salientar que entre os finalistas tamén puidemos atopar outras iniciativas tecnolóxico-culturais que abren interesantes camiños para o noso desenvolvemento futuro nas redes, como por exemplo Contoplanet (contos en galego para aparellos de Apple achegados por Galaxia e El Perro Verde), Eufalo.tv (proposta de A Navalla Suíza para ilustrar a situación da lingua galego a través da participación en liña) e máis O soldadiño de chumbo para iPad (estrea de Galaxia que inaugura a súa serie Contos de Cinema).
No que se refire á mellor curta de ficción, a gañadora foi Xoel y los X-Men. Na modalidade mellor curta de animación, impúxose Gato encerrado, de Maria Helena Varela e Silvina Cornillón. En mellor obra experimental fíxose co primeiro premio a peza Manuscritos Pompenianos, de Marcos Nine, e en mellor achega de publicidade gañou Orgullosos do Galego, de Filmanova.