Apple supera a Google como marca

O estudo que realiza anualmente BrandZ para destacar as 100 marcas máis importantes a nivel mundial sorprendeu ao amosar que Apple superou a Google como a marca máis valiosa, posto que o buscador ostentou durante 4 anos seguidos.
A relevancia do iPhone e do iPad conseguiu que Apple gañase moito peso nos últimos meses, chegando a unha valoración de marca de 153.286 millóns de dólares, mentres que Google quedou en 111.498, IBM en 100.849 millóns, McDonalds en 81.016 millóns, Microsoft en 78.243 millóns e Coca-Cola en 73.752 millóns, confirmando que o sector tecnolóxico está a ser o máis representativo para o público no que a recoñecemento de marca se refire.

Na listaxe de BranZ tamén podemos destacar a presenza de Movistar no posto 21, o Banco Santander no 77 e Zara no 86. Como curiosidade tamén temos o feito de que Facebook só acadase un posto 35, véndose superada por Baidu, o buscador chinés, que quedou nun posto 29, deixando evidente que os mercados asiáticos están a gañar importancia (China Mobile tamén destacou no 9º posto).

Éxito de Apple en China

A listaxe de BrandZ chega xusto no momento no que Apple abraia por conseguir que en China, mercado no que a piratería industrial acéptase con total normalidade, o lanzamento do iPad 2 fose un éxito contundente, esgotando as unidades dispoñibles en 4 horas. Actualmente en China só está á venda o modelo con Wi-Fi, e hai pouco tamén tivo unha acollida semellante no país o iPhone 4 de cor branca.

A estrea do iPad 2 en China vista en vídeo