Tecnoloxía galega en axuda das persoas con discapacidade motriz

Grazas á colaboración desinteresada de dúas disciplinas tan dispares como son a pedagoxía e a enxeñaría, e ás ganas de axudar aos colectivos máis necesitados do noso país, unha nena do CEIP Seis do Nadal de Vigo vén de cumprir o seu desexo máis anhelado: poder comunicarse coas persoas que a rodean, un soño que dista moito dos que poden ter os seus compañeiros de primaria do colexio e que agora se fai realidade grazas ao desenvolvemento do VirtualTEC.
O VirtualTEC é unha ferramenta desenvolvida por Jonathan Juncal, enxeñeiro técnico en Telecomunicación na especialidade de Son e Imaxe, para o seu proxecto Fin de Carreira, que contou coa axuda do profesor da Universidade de Vigo, Enrique Costa (como titor do proxecto) e coa directora do Centro de Educación Especial Manuel López Navalón de Santiago de Compostela, coas súas orientacións sobre discapacidade motriz.

Este software vai instalado nun tablet e fai que pola súa pantalla vaian pasando as diversas opcións de menú que dispón, cunha cadencia que determine o usuario e que oscila entre os 2 e os 10 segundos. Para acceder a unha opción determinada, o usuario pode pulsar en calquera punto da pantalla, aumentando os puntos de contacto e a accesibilidade, de xeito que resulta doado de usar por unha persoa con dificultades de movemento ás que lle sería complicado limitarse a un só botón.
Segundo lemos no xornal dixital da Universidade de Vigo (DUVI) a ferramenta permite acceder a letras (para construír palabras e frases), a números, a símbolos ou mesmo a smileys, “de maneira que o usuario pode expresar de xeito rápido e sintético as súas emocións”.

Tamén conta cun menú de Accións Frecuentes, que a nai da rapaza “destaca pola súa utilidade”, ao permitir gardar as accións máis común do día a día da nena, como ter sede, ter fame, ter sono, querer desprazarse… sen necesidade de teclear.
Outra das vantaxes do teclado, que por certo está dispoñible en galego, castelán e inglés, é que se pode instalar en calquera tablet sen características especiais, e ofrece un sintetizador de voz que transforma en son o texto escrito polo usuario.
Vistos os bos resultados acadados inicialmente con esta alumna, os seus creadores subiron a aplicación a Android Market, onde está dispoñible de balde para que calquera persoa con necesidades similares o poida usar no seu trebello móbil. Neste sitio, asemade, os investigadores deixaron o seu contacto para que calquera usuario lles poida suxerir melloras ou solicitar adaptacións, de maneira que se poida seguir avanzando nun campo tan agradecido como é o da pedagoxía.