Jillian Michaels terá un xogo de fitness para Kinect

Grazas á Wii e os seus controis de movemento os xogos de fitness conseguiron certa sona nos últimos anos, e sagas como a de Jillian Michaels Fitness Ultimatum, que xa superara o medio millón de copias vendidas na súa versión de 2009, xa contou con secuelas en 2010 e 2011, polo que non debería sorprendernos que agora 505 Games anuncie que están a preparar Jillian Michaels Fitness Adventure, un xogo exclusivo para o sensor Kinect da Xbox 360 que estará nas tendas a partir de novembro, e que busca levar ao xogador a traballar de forma intensa todo o corpo dun xeito divertido que vai máis aló da realización de exercicios de aerobic, e viste a súa experiencia de xogo de aventura interactiva.
En Jillian Michaels Fitness Adventure teremos que viaxar a unha xungla na que realizar distintas actividades que buscan servir de adestramento persoal. O xogo conta con con varios modos de exercicio: – Fitness Adventure: o xogador deberá correr, saltar e escalar nun circuíto na xungla – Adestramento en Circuíto: con 10 exercicios seleccionados con 3 niveis de dificultade – Adestramento de Fitness: que permite adaptarse ao ritmo do usuario na realización dos seus exercicios.
O programa tamén é compatible con distinto material de fitness cos que xa contan habitualmente os seguidores desta práctica deportiva (que serven para reforzar algúns exercicios), permite compartir os resultados acadados cos amigos a través de clasificacións en liña, e tamén conta con estatísticas para que os usuarios poidan coñecer os seus progresos.