Novas cámaras sen espello de Nikon

Nikon presentou un par de novas cámaras dixitais sen espello con lentes intercambiables, que buscan achegar unhas prestacións comparables a unha cámara réflex cun deseño máis compacto. A Nikon V1 e J1 comparten moitas características, como sensor CMOS de 10,1 Mpíxeles, conexións USB e HDMI, modo de captura de cámara lenta (1.200 imaxes por segundo), pantalla LCD de 3 polgadas, disparo de 10 ráfagas por segundo, visor electrónico de alta resolución, e gravación de vídeo en alta definición (1.080p a 30 cadros por segundo ou 720p a 60 cadros por segundo).
Atendendo ás diferenzas, a Nikon J1 destacaría por contar cun flash integrado, redución de ruído na gravación de vídeo, un sistema de enfoque automático de 73 puntos, motor de procesamento de dobre núcleo EXPEED e a posibilidade de gravar vídeo ata 29 minutos nun único ficheiro (superando o tope de 5 minutos que tiñan as súas predecesoras); mentres que a Nikon V1 conta con visor electrónico, flash externo, entrada de micrófono estéreo, un porto multi-accesorio (para, por exemplo, conectar un módulo de GPS) e un chasis de aliaxe de magnesio.
Estas cámaras chegarán ao mercado norteamericano o 20 de outubro a 649,95 dólares a Nikon J1 e a 899,95 dólares a Nikon V1.