O fútbol domina as vendas de videoxogos en outubro

A Asociación Española de Distribuidores e Editores de Software de Entretemento (aDeSe) vén de actualizar a súa listaxe cos videoxogos máis vendidos en España cos resultados do mes de outubro, confirmando que estamos nun país onde o fútbol é o rei do lecer electrónico, xa que os títulos FIFA 12 e Pro Evolution Soccer 2012 ocupan 6 dos 10 primeiros postos en vendas, fronte a 3 postos para xogos de acción e outro para o Formula 1 2011.
Sorprende ver que finalmente FIFA 12 é líder en vendas en España, superando ao Pro Evolution Soccer 2012 (que quedarían nun segundo posto tanto en PlayStation 3 como en Xbox 360 e PSP). De feito, o xogo de EA Sports está de nº 1 en vendas en múltiples plataformas (PS3, Xbox 360, Wii e PSP), mentres que en PC e Nintendo DS encabezan as súas listaxes de vendas Football Manager 2012 e Inazuma Eleven respectivamente, sendo a única plataforma na que o fútbol non arrasa a Nintendo 3DS, que ten a The Legend of Zelda: Ocarina of Time 3D como título de referencia.
Fóra do fútbol parece que o outro grande trunfador en outubro foi Battlefield 3, xogo de acción que conseguiu quedar nun digno 3º posto coa súa edición limitada para PC e PS3 e cun 4º posto en Xbox 360 (plataforma na que sucumbiu a outro título do mesmo xénero, Gears of War 3, que é exclusivo para a consola de Microsoft, polo que xa era de agardara que acadase unhas vendas superiores).