O Lenovo IdeaCentre Q180 chega como un dos ordenadores máis pequenos do mercado

Mentres o mercado está a ser inundado por tablets e Ultrabooks, Lenovo lembrou os nettops, e vén de estrear o Lenovo IdeaCentre Q180, un equipo de só 192 x 155 x 22 milímetros (na súa versión básica) que presume de ser “o ordenador de escritorio máis cativo do mundo”, e que parte dun prezo de só 369 dólares (276,38 euros). Este equipo, pese ao seu tamaño, é capaz de cumprir non só con labores de ofimática básicas, senón que tamén serve como un completo reprodutor multimedia, podendo reproducir vídeos en alta definición e sendo incluso compatible co formato Blu-ray 3D na súa configuración máis elevada.
O Lenovo IdeaCentre Q180 pode configurar ata cunha gráfica AMD Radeon HD 6540A con 512 Mbytes de memoria, procesador Intel Atom D2500 de dobre núcleo, 4 Gb de RAM, 750 Gb de disco duro ou 128 Gb nunha unidade SSD, gravadora de DVD ou lector de Blu-ray, son 7.1, portos USB 2.0 e USB 3.0, lector de tarxetas de memoria 8-en-1 con soporte do formato SDXC, saídas VGA e HDMI, certificación Energy Star 5.0 e soporte VESA para poder adherilo á parte traseira dun monitor (para minimizar o seu impacto no escritorio).
Este ordenador comezará a distribuírse a primeiros do mes de decembro, e a súa configuración con 4 Gb de RAM, 500 Gb de disco duro, gravador de DVD e saída HDMI continúa a ter un prezo bastante axustado (429 dólares), dando a entender que estamos ante un equipo moi atractivo para que queira ter un centro multimedia no seu salón ou desexa converter un monitor nun ordenador todo-en-un.