Raspberry Pi, un ordenador do tamaño dunha tarxeta de crédito

Nos últimos anos a Raspberry Pi Foundation está a traballar no Reino Unido na creación dun pequeno ordenador baseado en LInux (cunhas dimensións semellantes ás dunha tarxeta de crédito: 85,6 x 54,98 milímetros) que chegaría en 2 versións: unha cun prezo de 35 dólares que contaría cun procesador ARM11 a 700 MHz e 256 Mb de RAM capaz de correr o título multixogador Quake 3 Arena, e outra por 25 dólares, que só contaría con 128 Mb de RAM. Contan con portos USB 2.0, o modelo de 35 dólares ten conectividade Ethernet e empregan como almacenamento tarxetas de memoria.
Este tipo de produtos poderían ter grande utilidade en contornos educativos, aínda que tamén serían atractivos para a súa conexión directa a un televisor a través dunha entrada HDMI, e aínda que o seu prezo pareza imposible, agora adiantan que vai comezar a comercializarse en xaneiro, cunha remesa inicial dunhas 10.000 unidades. Tamén agardan conseguir distribución internacional no segundo trimestre de 2012.