GameStop pecha as súas tendas en Portugal e norte de Irlanda

Nun momento no que moitos dos centros comerciais galegos contan ata con 2 tendas de videoxogos sorprende ver que a cousa non vai igual de ben en todos os mercados, e a cadea GameStop (que actualmente ten 10 tendas en Galicia) vai cesar a súa actividade en Portugal o vindeiro 7 de febreiro, polo que pechará 13 tendas e pon así fin a unha aventura empresarial de 3 anos.
Este peche vén acompañado por unha liquidación de xogos con descontos de ata o 50% e, sorprendentemente, na páxina web da compañía en Portugal convidan aos visitantes a visitar a tenda en liña da cadea en España, dando a entender que servirá para atender os seus pedidos nos vindeiros meses.
GameStop tamén vén de pechar as súas tendas en Belfast, Derry e Newry, nunha reestruturación que parece provocada pola conxuntura económica actual, que afecta máis a uns territorios que a outros, pois as vendas de videoxogos como descargas aínda non é tan popular como para provocar o peche dos establecementos físicos (aínda que a longo prazo parece que será así, no que supón un suma e segue de establecementos comerciais que quedan obsoletos por mor dos avances na distribución dixital).