A Facultade de Informática da UDC celebra mañá a III edición da FICOnLan

Mañá venres, ás 20:00 horas, a Facultade de Informática da Universidade da Coruña abrirá as portas da edición máis concorrida da FICOnLan celebrada ata o momento, a que será a terceira.
A party informática, que este ano segundo a organización “baterá cifras record de aforo e cheo absoluto” (algo que non soe acontecer nas últimas edicións deste tipo de eventos), contará con multitude de concursos de índole tecnolóxica, así como coas tradicionais xornadas de desenvolvemento de aplicacións do máis variado.
Tampouco faltarán este ano os relatorios de programación, os talleres de desenvolvemento de apps móbiles, as charlas sobre seguridade informática ou de intelixencia artificial, entre outras categorías.
O que se trata é de aproveitar o tempo de ocio dos asistentes ( lembremos que se celebra durante os días de Entroido) para espertar o interese polas novas tecnoloxías e promover o seu emprego en tódolos eidos posibles.
Este ano, seguindo a tradición da edición pasada e en vistas do éxito acadado, a organización decidiu repetir a competición dos Puntos FICO, na que os concursantes obtiñan puntos por participar nos diferentes concursos e torneos, competindo por un posto de honra na clasificación. Desta maneira, este ano volveranse a recoñecer aos mellores participantes globais da party e premiaranse con máis premios.
Outra sección de éxito na FIC do ano pasado foi a extranet, que de novo volverá a ser de entrada libre e de balde para tódolos asistentes.
A Asociación Mangalego encherá este espazo de videoconslas e xogos de mesa, que estarán emprazados na planta 1 da FIC.
Ás charlas de Pablo López e Iván Rodríguez Arós das que falamos onte, hai que engadir a de Antón Gómez, un experto en apostas deportivas que ensinará aos asistentes a minimizar riscos e apostar na Rede en tempo real sen riscos.