O móbil Lumigon T2 tamén funciona como mando a distancia universal

A danesa Lumigon levou ao Mobile World Congress de Barcelona o seu novo teléfono Lumigon T2, un elegante terminal co sistema operativo Android 4.0 que destaca polos seus detalles en aceiro, pantalla de 3,8 polgadas cunha resolución de 480×800 píxeles con cristal Gorilla, son de grande calidade grazas á tecnoloxía ICEpower de Bang & Olufsen e a posibilidade de operar como mando a distancia universal para controlar por infravermellos o noso televisor, a nosa cadea de música ou outros dispositivos domésticos coma o aire acondicionado.
Este móbil tamén ten unha boa cámara de 8 Mpíxeles e cun botón lateral dedicado á mesma, facilitando o seu uso. Aínda que a cámara integra recoñecemento facial, tamén será posible premer sobre a pantalla nos puntos que se desexe enfocar. Funciona cun procesador Qualcomm Snapdragon a 1,4 GHz, soporta tarxetas de memoria microSDHC de ata 32 Gb, conta con GPS, compás dixital, Wi-Fi e Bluetooth, e tampouco prescinden de emisor/receptor de radio FM e tecnoloxía NFC, de xeito que non todo é aparencia neste completo terminal que ten un grosor de só 9,9 milímetros. Chegará ás tendas antes do verán.