Un par de vídeos do videoxogo galego Zombeer superan as 50.000 reproducións só en China

O estudo compostelán Moonbite Games&Animation, vén de lanzar os dous primeiros trailers do seu Zombeer, Zombies&Beer, que segundo os seus desenvolvedores, “xa dan pistas acerca do look” do que será o videoxogo galego do ano.
Trátase dun videoxogo de acción e humor negro deseñado para o mercado internacional multiplataforma, que xa foi presentado oficialmente no Gamelab 2011, e que este ano será a imaxe de Mundos Digitales, a celebrar na Coruña do 4 ao 7 de xullo.
Estes dous primeiros vídeos tiveron gran repercusión tanto en webs especializadas como en blogs centrados no sector dos videoxogos, sendo China o país no que obtiveron unha meirande repercusión con máis de 50.000 reproducións repartidas entre un primeiro teaser e 30.000 reproducións nun so portal especializado, o Gametrailers.com.
O protagonista do xogo, K, esperta cunha mordedura nun brazo logo dunha noite de troula universitaria. A súa misión é atopar e salvar á súa moza Karen que estaba na mesma festa, convertida agora nun campo de batalla.
Trátase, á fin, do típico xogo de zombies nos que hai que evitar ser mordido ou atacado por un. Mais neste caso o antídoto para non transformarse nun deles non é outro que beber cervexa, iso si, con moderación, pois o exceso do líquido dourado tamén podería facerlle perder o control ao protagonista do xogo e convertelo nunha presa fácil para os zombies.
Dende o estudo independente compostelán anuncian que seguirán a lanzar máis vídeos sobre o videoxogo, aos que se poderá acceder na súa páxina web oficial.

Último vídeo promocional do xogo ao que seguirá outro nun par de días