O xogo de The Walking Dead chega hoxe a iPhone e iPad

O xogo baseado en The Walking Dead (colección de comics de Robert Kirkman popularizada grazas á súa adaptación televisiva) conseguiu grande éxito en versións para PC, Mac OS X, PlayStation 3 e Xbox 360, e para ampliar a súa base de usuarios estréase hoxe en iOS, de xeito que por 3,99 euros quen teña un dispositivo a partires dun iPad 2 ou dun iPhone 4 poderá gozar do primeiro episodio desta aventura, estando máis adiante dispoñibles 4 episodios máis, que poden adquirirse en conxunto por 11,99 euros.
Esta conversión do xogo a dispositivos de Apple está bastante coidada, para adaptar a experiencia a pantalla táctiles. Nesta aventura controlaremos a Lee Everett nas súas pescudas, accións, diálogos e tomas de decisións, facendo ao usuario partícipe dunha historia na que o camiño percorrido afectará en episodios posteriores, conseguindo un título sólido que parece estar a convencer a crítica e público, pois nas súas distintas plataformas conseguiu unha puntuación en Metacritic de entre 79 e 84 sobre 100.