Microsoft presenta ratos e teclados deseñados para Windows 8

Aínda que Microsoft sorprendese ao anunciar o seu produto Surface, o certo é que a compañía de Redmond si ten moita experiencia fabricando hardware, pero non equipos completos, senón accesorios, e para demostrar que nese ámbito ten moito que dicir, anuncia hoxe os teclados e ratos que deseñaron pensando no futuro Windows 8, sistema operativo que chegará ao mercado o vindeiro 26 de outubro, data na que tamén está confirmada a chegada do devandito tablet Surface ao mercado (cando menos na súa versión con Windows RT).
Un dos produtos máis sorprendentes de Microsoft para Windows 8 sería o Wedge Touch Mouse, rato sen fíos con tecnoloxía BlueTrack (de xeito que funcionará sobre practicamente calquera superficie) que ten unha superficie táctil a xeito de trackpad para realizar desprazamentos en 4 direccións e navegar empregar os dedos. O seu deseño ultracompacto permitiría transportalo dun xeito cómodo. Este produto terá un prezo de venda de 69,95 dólares.

Como complemento ao Wedge Touch Mouse teriamos o Wedge Mobile Keyboard, un teclado ultrafino que estaría deseñado principalmente para permitir unha cómoda entrada de texto en tablets, que destaca por contar cunha funda de protección que pode transformarse nun soporte para un tablet. Comunícase mediante Bluetooth e o seu prezo de venda será de 79,95 dólares.
Máis tradicionais serían o Sculpt Touch Mouse e o Sculpt Mobile Keyboard, que custarán 49,95 dólares cada un e que serían unha oferta bastante equilibrada e claramente máis asumible para ter unha boa experiencia de uso de Windows 8.
Tamén cómpre destacar que o actual Microsoft Touch Mouse, rato que actualmente só funciona baixo Windows 7, recibirá a correspondente actualización para poder tirar proveito das súas prestacións baixo Windows 8.