Angry Birds incorpora novos niveis e estrea un xogo de balde en Facebook

O popular xogo Angry Birds, pese a ser xa todo un clásico, continúa a contar con actualizacións con novos niveis, o que mantén o seu atractivo de compra, e hoxe, coa versión 2.20 inclúe 15 novos niveis no capítulo de verán Surf and Turf, á vez que tamén incorpora 4 novos poderes: Super Seeds (aumenta o tamaño dos paxaros, King Sling (aumenta a potencia dos tiracroios), Sling Scope (para facer tiros con precisión) e BirdQuake (provocando tremores que destrúen os escenarios), que facilitan conseguir 3 estrelas nos niveis máis esixentes.
O Angry Birds orixinal está dispoñible por 0,79 euros para iPhone e iPod Touch, e por 2,39 euros para iPad, mentres que a versión para Android (de balde) continúa sen esta última actualización (aínda que é de agardar que se actualice en breve).

Quen queira seguir gozando de máis niveis dos paxaros anoxados de Rovio, tamén poden xogar a 10 niveis en Facebook que están dispoñibles de balde grazas ao patrocinio de Intel, de aí que os porcos verdes teñan invadido un escenario con ordenadores portátiles e placas de circuítos. Como é habitual nas versión de Angry Birds para Facebook, tamén será posible convidar a amigos para competir para ver quen consegue a mellor puntuación nestes retos vía web.
E para culminar a vaga de novas sobre esta franquía de Rovio, tamén temos un vídeo no que anuncian a vindeira actualización de Angry Birds Space, que chegará no outono co gallo da chegada do robot Curiosity a Marte:

Anuncio en vídeo da actualización do Angry Birds orixinal