Forte demanda da Wii U nos EE.UU.

Co lanzamento da primeira Wii viñeron moitos problemas de abastecemento que converteron á consola de Nintendo nun produto difícil de conseguir durante os primeiros meses (especialmente en datas de Nadal), e pese a que da Wii U aínda non se escoitase falar moito nin se lanzasen campañas promocionais en televisión, dende EE.UU. están a advertir dunha forte demanda que levou a que a cadea GameStop pechase o proceso de reserva da nova consola (que contará con algunhas unidades para os que participen do seu programa de fidelidade), non sendo a única marca que seguiu uns pasos semellantes (Best Buy tamén pechou as reservas da Wii U).
Ao parecer, ás poucas horas de abrirse as reservas da Wii U en numerosas tendas en liña norteamericanas, esgotáronse as unidades (especialmente do modelo Premium), o que parece indicar que a nova consola vai ser todo un fenómeno durante as súas primeiras semanas de vida.

Bloqueo rexional

Nintendo tamén confirmou que a Wii U vai contar cun sistema de bloqueo rexional, de xeito que os xogos adquiridos en EE.UU., Xapón e Europa son funcionarán en consolas adquiridas neses mesmos territorios, pechando as portas á importación no que vén a ser unha práctica habitual por parte de Nintendo nas súas consolas domésticas, mentres que Sony e Microsoft optan por permitir que o bloqueo rexional dos xogos sexa algo que decidan os seus editores (o que permite que moitos títulos poidan conseguirse de importación).