Runbo X5 e X3, os smartphones con walkie-talkie para botarse ao monte

Os aventureiros que gusten de estar comunicados nas súas excursións sen prescindir das bondades dun smartphone poden optar por un par de móbiles reforzados que descubriu a xente de Engadget durante o CES de Las Vegas, que chegan dende China a un prezo oficial de 1.999 iuans (242 euros) o que resulta bastante económico se temos en conta as súas prestación.
Por unha banda temos o Runbo X5, un móbil resistente a golpes, á auga e ao po (IP67) que funciona cun procesador Cortex A9 de dobre núcleo a 1 GHz, 1 Gb de RAM, 4 Gb de almacenamento interno ampliable mediante tarxetas de memoria microSD de ata 32 Gb, que conta cunha pantalla IPS de 4,3 polgadas cunha resolución de 800 x 480 píxeles, o que xa de por si son unhas boas prestacións para un dispositivo deste tipo, pero que, ademais, inclúe cámaras de 8 e 0,3 Mpíxeles, altofalante de grande volume, Android 4.0.4, Bluetooth 3.0, Wi-Fi, espazo para 2 tarxetas SIM, GPS, toma para auriculares e unha enorme batería de 3.800 mAh.

Para completar o produto, unha radio walkie-talkie que pode funcionar a unha distancia de ata 10 quilómetros (aínda que os usuarios que non gusten de tal función poden sacarlle a voluminosa antena que permite tal función). Mide 155 x 75 x 25 milímetros e pesa 312 gramos.
Pero este móbil non chega só, senón que tamén ten un irmán menor, o Runbo X3, que polo mesmo prezo conta cunha pantalla IPS de 3,5 polgadas cunha resolución de 800 x 480 píxeles, que ten un tamaño menor para poder deixar sitio a un teclado QWERTY, de xeito que sería unha mellor opción para os que non gusten de pantallas táctiles para a introdución de texto.