EA confirma o lanzamento de FIFA 14 no outono

Electronic Arts anunciou hoxe un xogo que sobra dicir que non é ningunha sorpresa, o FIFA 14, que polo momento ten confirmada a súa dispoñibilidade no outono para Xbox 360, PlayStation 3 e PC (é de prever que no E3 anuncien as versións para consolas de nova xeración), e que como principal novidade aseguran que terá innovacións que fará que os xogadores poidan experimentar a sensación de marcar grandes goles.
Entre estas novidades estaría o sistema de físicas Pure Shot, que transformará o xeito de darlle ao balón para dotar aos disparos dun grande realismo; con Real Ball Physics determinaranse as traxectorias dos balóns, permitindo que os xogadores teñan máis posibilidade de control dos seus lanzamentos; Protect The Ball permitirá bloquear e esquivar rivais ou evitar que nos rouben o balón; intelixencia de equipo mellorada; e un maior control cando se está a correr coa bola.

Aparte das melloras en xogabilidade, FIFA 14 tamén incluirá novidades no Modo Carreira, que coa Global Scouting Network permitirá cazar talentos a escala mundial. O xogo tamén contará coas licenzas oficiais de máis de 500 clubs de fútbol, novos modos de xogo en liña para fomentar a competición social, cambios no popular FIFA Ultimate Team e novas prestacións no servizo en liña EA Sport Football Club.