Un dos creadores do xogo Underground participará en RetroCoruña

A feira RetroCoruña celebrará a súa 5ª edición o sábado 7 de setembro no Pavillón Municipal de Sada, para xuntar a numerosos seareiros galegos da informática clásica e os videoxogos, que nesta nova entrega dedicará un especial interese aos ordenadores MSX, que este ano celebran o seu 30º aniversario.
Como en anteriores edicións, o encontro terá unha grande exposición de ordenadores na que poderán verse a meirande parte de equipos de 8 bits (comercializados entre 1977 e 1992) entre os que destacaban o ZX Spectrum ou o Commodore 64, pero sen esquecer a equipos menos populares como o Dragon 32, o Acorn Electron ou o Z81, sendo unha excelente oportunidade para repasar a historia da informática moderna. A estes preto dun cento de ordenadores acompañaranos moitas consolas de videoxogos clásicas, que poderán probarse in situ para lembrar os vellos tempos. e tamén será posible participar en torneos para comprobar quen son os mellores xogadores de clásicos como Road Fighter (MSX), Pac-Man, Donkey Konga, Street Fighter II Turbo e Tekken 3.

Para completar esta celebración retro, ás 18:30 horas desenvolverase unha charla no primeiro andar do recinto, na que José Ramón Suárez, un dos 3 desenvolvedores do xogo Underground editado en 1988 para ZX Spectrum, MSX e Amstrad PCW falará da súa iniciación nos ordenadores, no xeito de traballar daqueles tempos e de como se facían as conversións dos xogos a distintas plataformas. Tras o relatorio proxectarase o documental La edad dorada del software español.
No recinto sadense tamén estarán presentes distintos expositores nos que ver tamén algunhas xoias e, nalgún caso, poder mercar xogos ou produtos inspirados na súa cultura, estando confirmada a participación de Retro Ordenadores Orty (Madrid/Sada), Puppet Master (Madrid), JoJo (A Coruña), Hipsilon NES (A Coruña), Web9Bits (Vigo), Comunidad Ociorum (A Coruña), AUIC (Madrid/A Coruña), FloppyDerno (País Vasco), Tender Pixel Art (País Vasco), Zona Arcade (A Coruña) e Movemento Xove (A Coruña).