Apple presenta os iPhone 5C e 5S

Esta tarde Apple celebrou a agardada conferencia destinada a dar a coñecer os novos modelos de iPhone, partindo coa presentación das novidades do seu sistema operativo, iOS 7, que o vindeiro 18 de setembro estará dispoñible para os usuarios de iPhone, iPad e iPod Touch, engadindo un detalle bastante interesante para os usuarios, que é feito de que as aplicacións Pages, Numbers, Keynote, iPhone e iMovie, con prezos de entre 4,49 e 8,99 euros cada unha, pasarán a ser de balde, o que supón un importante avance no uso de dispositivos con iOS para a produtividade sen ter que adquirir software adicional (aínda que esta oferta só estará dispoñible para quen active un dispositivo con iOS a partir do 1 de setembro).

iPhone 5C: plástico, cores, pero pouco económico

Pero o sistema operativo non podía ser a estrela da xornada, principalmente porque leva meses en probas, de xeito que dista moito de ser unha novidade para o público, aínda que os anuncios de verdade tampouco foron unha sorpresa, senón a confirmación de que este ano teremos un sucesor do iPhone 5 chamado iPhone 5S, e un modelo económico chamado iPhone 5C.
O iPhone 5C podería considerarse realmente como o produto que realmente captaba unha maior atención esta tarde, polo que podería supor a chegada ao mercado dun smartphone de Apple considerado como de baixo custo, o que para moitos foi unha grande decepción, pois finalmente o iPhone 5C non deixa de ser unha versión do vello iPhone 5 ao que se lle colocou unha carcasa de policarbonato de cor verde, azul, amarela, rosa ou branca, e á que se lle mellorou a cámara frontal (para permitir a captura de vídeo a 720p).
Pero a grande decepción chegou o verse que o prezo será o habitual para o iPhone do ano anterior, ou sexa, que o iPhone 5C o que fará realmente é substituír ao iPhone 5 no catálogo de Apple, ofrecéndose a un prezo duns 100 euros menos que o seu irmán maior, o iPhone 5S. A opción máis barata que quedaría dispoñible sería a do iPhone 4S, que xa mudou o seu prezo libre aos 399 euros, e que nos EE.UU. ofrecerase de balde con algunhas operadoras (cun plan de datos e un compromiso de permanencia de 24 meses).
Un detalle curioso sobre o iPhone 5C é que, pese a que xa se vende en cores rechamantes, contará con fundas de distintas cores, que incluso teñen buratos para deixar ver a carcasa do móbil, que ao ofrecerse en 6 cores distintas crean un total de 30 combinacións cromáticas que conseguir ao combinar móbil e funda.

Vídeo de presentación do iPhone 5C

iPhone 5S: máis potente, con mellor cámara e con sensor biométrico

O smartphone que si foi unha novidade real é o iPhone 5S, que conserva a aparencia externa do iPhone 5, aínda que agora estará dispoñible en cor gris espacial, ouro e prata, podendo tamén combinarse con fundas de pel de 6 cores distintas. Os cambios do dispositivo serían pouco visibles, como no seu procesador, que dá o salto aos 64 bits co seu procesador A7 e o seu co procesador M7 (que aseguran que conseguirían un rendemento ata 40 veces máis rápido que o primeiro iPhone); a súa cámara, que aínda que mantendo os 8 Mpíxeles, ofrece un sensor máis grande, unha apertura maior (f/2,2) e unha maior sensibilidade á luz, conseguindo, en definitiva, unhas fotografías de máis calidade; a cámara tamén destaca por incorporar un Flash True Tone (composta por un LED branco e outro ámbar, que se axustan para conseguir a mellor iluminación posible segundo as circunstancias) e por estrear un modo de gravación a 720p de 120 fotogramas por segundo (o que resulta moi práctico para xerar secuencias a cámara lenta); a cámara frontal tamén estrea vídeo a 720p; e , finalmente, o botón de Home agocha un sensor biométrico que recoñece ao usuario pola súa pegada dixital (prestación limitada inicialmente ao desbloqueo do terminal e á autorización de pagamentos, permanecendo bloqueada para aplicacións de terceiros).

O sensor biométrico do iPhone 5S explicado en vídeo

Ambos móbiles chegarán ao mercado o 20 de setembro, aínda que non para o mercado Español, onde deberemos agardar unha semana máis para poder adquirir os novos móbiles de Apple (data aínda non concretada por Apple, pero que pode deducirse de anos anteriores), que dá a impresión de que manterán a mesma estrutura de prezos que os iPhone actuais, especialmente se atendemos aos prezos que xa figuran na páxina de Apple en Francia, onde sitúan o iPhone 5C nun prezo de a partir de 599 euros e o iPhone 5S a partir dos 699 euros. Aparte do prezo, na Internet tamén hai moitas voces que apuntan como decepcións sobre os novos produtos que Apple continúa sen adoptar a tecnoloxía NFC, que manteñen os Mpíxeles da cámara nun rango superado por outros fabricantes, que non ofrecen un smartphone cunha pantalla de maior tamaño (algo moi demandado por certo público) e que non ofrecerán o rumoreado iPhone 5S cunha capacidade de 128 Gb (mentres que xa hai fabricantes chineses ofrecendo móbiles con tal capacidade interna, e incluso con opcións para ampliala).
Os interesados en ver a presentación de hoxe, que non puido seguirse en directo a través da web, poden vela en diferido dende a páxina web de Apple.

Vídeo no que podemos ver as melloras da cámara do iPhone 5S