Galicia destaca no acceso móbil á Internet

O Observatorio da Sociedade da información e a Modernización de Galicia (OSIMGA) vén de publicar o seu informe sobre Internet e Banda Larga nos Fogares Galegos (que podemos descargar en formato PDF) que destaca un crecemento significativo dos accesos a Internet dende o móbil por parte da cidadanía galega, destacando que nos últimos tres meses o 64,8% dos galegos usuarios da Internet empregaron algún tipo de dispositivo móbil para acceder á Rede, de xeito que estariamos 8,8 puntos sobre a media do Estado.
Segundo se recolle no informe un 56,3% de fogares galegos dispón de conexión a Internet e un 53,1% ten contratada unha conexión de banda larga. O ritmo de crecemento da banda larga en Galicia no intervalo 2008-2012 foi dun 67% e en España dun 49,6%.
Na contratación da Internet inciden de xeito importante as variables xeográficas e demográficas de cada zona. O análise do OSIMGA indica que a contratación de banda larga aumenta a medida que o fai o número de habitantes do concello ata acadar un 64,4% nos municipios con máis de 50.000 habitantes fronte ao 32,8% dos concellos de menos de 5.000 habitantes.

A idade media da poboación indica tamén unha correlación coa contratación de banda larga. Con carácter xeral, nas comarcas con idade media inferior aos 46 rexístranse as porcentaxes medias máis elevadas de fogares con banda larga, entre o 50 e o 60%. Na maioría das comarcas con idade media máis elevada (superior aos 54 anos) a porcentaxe de contratación sitúase por debaixo do 40%.
O factor económico é outra variable que incide no grao de contratación de banda larga. Un 83% dos fogares con renda superior a 3.500 euros teñen banda larga fronte ao 19,7% dos fogares con ingresos inferiores aos 600 euros.
A composición do fogar garda de novo una evidente relación coa banda larga. Un 71,2% dos fogares compostos por 4 membros contan con banda larga fronte ao 31,4% dos fogares unifamiliares. A presenza no fogar de nenos en idade escolar obrigatoria consolídase como un factor significativo para a contratación de banda larga. O 68,4% dos fogares onde residen nenos dispoñen de conexión a banda larga, 20,1 puntos máis que no resto de fogares.