PS Plus ofrecerá os xogos Dead Nation e Tomb Raider durante marzo

Sony anunciou hoxe os xogos dos que poderán gozar no mes de marzo os subscritores a PlayStation Plus, que terán acceso a un catálogo moi completo e de indiscutible calidade, que no caso da PlayStation 4 inclúe o xogo descargable Dead Nation: Apocalypse Edition, título de disparos vertical ambientado nun mundo apocalíptico inzado de zombis que conta cun modo campaña que pode xogarse en solitario ou en modo cooperativo. Tamén inclúe a expansión Road to Devastation, que incorpora 2 modos de xogo adicionais (Arcade e Infinito).

Para PlayStation 3 sorprenden incluíndo un dos mellores xogos do ano pasado, Tomb Raider, no que podemos vivir a historia que converteu a Lara Croft en toda unha aventureira. Completará a colección de xogos para PS3 a aventura épica Brothers A Tale of Two Sons, que permite empregar aos dous irmáns protagonistas á vez mediante os mandos analóxicos do mando DUALSHOCK, no que supón unha especie de xogo cooperativo para un xogador.
Para usuarios de PS Vita estarán dispoñibles títulos de menor peso, como son Pixeljunk Monsters Ultimate HD e Smart As!.
Todos estes títulos estarán dispoñibles a partir do 5 de marzo, sen custo adicional para os subscritores a PS Plus.

Trailer de Dead Nation: Apocalypse Edition, a interesante achega para PS4 de PS Plus en marzo