Un simpático proxecto de crowdfunding quere facer realidade o Google Glass

Cando Google amosou ao mundo de xeito oficial o seu proxecto Glass, sorprendía polo seu nome, xa que en inglés lentes dise glasses, mentres que glass significaría vaso, o que vén de aproveitar o humorista británico Shed Simove para iniciar unha campaña de micromecenado en Kickstarter para facer realidade o auténtico Google Glass, un vaso que ten gravado o logotipo de Google xunto a caixa de texto e o botón de busca propio do popular servizo web que producirase para os mecenas (pois xa conseguiu o financiamento preciso para converterse nunha realidade) durante o mes de xullo por un prezo que parte das 20 libras esterlinas (37 euros con portes incluídos) o que pode parecer moi caro para un vaso, pero moi barato para un produto chamado Google Glass.
O produto incluso pode personalizarse introducindo un texto na caixa de busca gravada na súa superficie exterior, o que podería resultar bastante axeitado para converter este produto nun agasallo, aínda que esta iniciativa tampouco está exenta de riscos, xa que carece de autorización oficial de Google, o que podería provocar que a compañía de Mountain View decidise que se retirase esta campaña por facer un uso da súa marca (aínda que o feito de que esteamos ante unha parodia non debería de provocar unha reacción de rexeitamento por parte do xigante tecnolóxico). O propio Simove xa comenta a xeito de broma que, de verse denunciado por Google, organizará outra campaña en Kickstarter para pagar as costas xudiciais.

Vídeo promocional da campaña de micromecenado