Un documental repasará a historia da Power Glove

O mundo dos videoxogos parece estar a ser unha grande fonte de inspiración para documentais que conseguen completar o seu financiamento con éxito a través do micromecenado, e o último proxecto neste liña é The Power of Glove, unha produción que busca xuntar 15.000 dólares para poder narrar o fenómeno que xurdiu en 1989, época na que Nintendo arrasaba nos EE.UU., o que levou a Mattel a lanzar a Power Glove, unha luva que podía conectarse á consola, sendo o primeiro sistema de control que funcionaba con xestos da man.

Sobra dicir que o produto tivo moita publicidade, chegando incluso a ser unha peza fundamental do filme The Wizard (El pequeño mago), pero non conseguiu callar entre o público ao achegar unha xogabilidade pouco satisfactoria, o que non evitou que se convertese nun obxecto de culto, que incluso viste un popular seareiro de Nintendo, Isaiah Triforce Johnson cada vez que acode ao lanzamento dunha consola da compañía nipoa.
O documental contará a historia da Power Glove a través de entrevistas cos seus creadores, á vez que tamén dará conta do impacto cultural que tería a longo prazo, amosando a artistas e hackers que resístense a deixar morrer ao curioso accesorio.

Os mecenas que paguen 10 dólares poderán obter unha ligazón ao filme, por 25 dólares poderanse ter tamén contidos adicionais, por 55 dólares unha edición en DVD… e incluso é posible pagar 160 dólares para conseguir unha edición especial do documental en VHS, o que sería unha auténtica peza de colección, moi na liña do que buscan os actuais seareiros da Power Glove.
A campaña de financiamento do documental rematará en setembro, pero a obra non ten previsto ver a luz ata decembro de 2015.