HP prepara un portátil económico con Windows 8.1

Nos últimos meses puidemos ver varios ordenadores portátiles de baixo custo orientados aos servizos na nube de Google, os Chromebooks, que pese a non ser especialmente potentes, conseguen servir como ordenadores básicos para funcións de produtividade, e agora HP quere trasladar esa fórmula a equipos con Windows, dos que o primeiro sería o HP Stream 14, que vén de filtrarse a través de Mobile Geeks, e que incluso incluiría 100 Gb de almacenamento en OneDrive na liña do que os Chromebooks fan con Google Drive.
O HP Stream 14 sería un equipo con pantalla de 14 polgadas cunha resolución de 1.366 x 768 píxeles, procesador AMD A4 Micro-6400T con gráfica Radeon R3, 2 Gb de RAM, 32/64 Gb de almacenamento flash, Wi-Fi N, Bluetooth 4.0, lector de tarxetas SDXC, 1 porto USB 3.0, 2 portos USB 2.0, saída HDMI 1.4b (con soporte para vídeo ata 1.920 x 1.080 píxeles a 60 Hz), cámara HP TrueVision HD, 4 altofalantes, batería de 3 celas (2.960 mAh) e 1,75 quilos de peso, que como principal atractivo ten un prezo base de 199 dólares para o seu modelo con 32 Gb de almacenamento interno e 249 dólares para o modelo con 64 Gb de almacenamento.