Amosan en China tablets con Windows 8.1 que custan pouco máis de 50 euros

Cando falamos de sistemas informáticos a prezos reducidos tendemos a pensar en solucións como Arduino, sinxelas placas que poden servir a xeito de controlador moi configurable, pero este ano está a mudar moito a situación, reducindo considerablemente a barreira para ter un ordenador completo grazas aos novos tablets con Windows 8.1 que chegan dende Asia, e que pronto invadirán as nosas tendas facendo máis asumible que nunca ter un equipo informático no fogar ou en moitos outros contornos.

Estes días na feira HKTDC de Hong Kong están a amosarse distintos produtos como o Emdoor EM-I870, que é un tablet con pantalla de 7 polgadas cunha resolución de 1.024 x 600 píxeles, 1 Gb de RAM e 16 Gb de almacenamento interno, que ao funcionar cun procesador Intel Z3735G de catro núcleos é capaz de correr Windows 8.1, o que resulta impresionante se temos en conta que o seu prezo de venda é de só 399 iuans (51,38 euros).
Co mesmo prezo tamén teriamos o CUBE iWork 7, que presumiría de pantalla IPS de 7 polgadas cunha resolución de 1.280 x 800 píxeles e dun grosor de só 5,95 milímetros, e que contaría cunha versión que incluiría o Office por só 599 iuans (76,74 euros).
Por 499 iuans (63,93 euros) tamén teríamos o Ployer MOMO8W, un tablet que conta cun procesador Intel Atom Z3735F, 2 Gb de RAM, 16 Gb de almacenamento interno e unha pantalla de 8 polgadas que tamén resultaría de grande interese para moitos usuarios que busquen un dispositivo para o consumo de contidos multimedia e que puntualmente poida empregarse para funcións máis propias dun ordenador tradicional como executar software ofimático ou realizar trámites en liña coas administracións públicas (para o que sistemas operativos como Android ou iOS non poden empregarse).
É de agardar que de cara ao Nadal podamos ver algún equipo de semellantes prestacións en España a prezos que é de agardar que baixen dos 100 euros.