Meizu leva ata os 546 dpi á pantalla do seu smartphone de 5,5 polgadas

Os fabricantes chineses parecen empeñados en demostrar ser capaces de fabricar terminais móbiles de alta gama, e non conforme con ter no seu catálogo o seu MX4, Meizu presenta agora o MX4 Pro, que supón un salto adiante para incorporar novos tamaños de pantalla de alta densidade, incrementando tamén outros elementos do móbil para poder estar á altura das esixencias do novo nivel gráfico.
O Meizu MX4 Pro é así un grande terminal con pantalla NEGA LCD de 5,5 polgadas cunha resolución de 2.560 x 1.536 píxeles (ou sexa, con 546 puntos por polgada, moi por diante dos 401 puntos da iPhone 6 Plus, co que practicamente empataba o anterior Meizu MX4), que para estar á altura de tal pantalla funciona cun procesador Samsung Exynos 5430 de 8 núcleos (4 núcleos de A15 a 2 GHz e outros 4 de A7 a 1,5 GHz) e 3 Gb de RAM, así como unha batería de 3.350 mAh.

A este móbil non lle faltan unha xenerosa cámara traseira de 20,7 Mpíxeles e sensor Sony (capaz de gravar vídeo a 4K), unha cámara frontal de 5 Mpíxeles, Wi-Fi AC, Bluetooth 4.0 e conectividade LTE capaz de realizar descargas a ata 150 Mbps. O terminal tamén ten vocación internacional, xa que funciona en 5 tipos de redes e soporta 13 bandas distintas.
Este smartphone chega ao mercado chinés en tres capacidades distintas (16/32/64 Gb) a prezos de 2.499, 2.699 e 3.099 iuans respectivamente (ou sexa, entre 325,33 e 403,45 euros), o que é un prezo bastante contido para as súas impresionantes especificacións.