A Xbox One estrea un lote con xogos independentes

Habitualmente as consolas de videoxogos véndense incluíndo un dos xogos supervendas máis relevantes, polo que resultou un tanto rechamante que Microsoft incluíse en exclusiva na súa tenda australiana en liña a Xbox One Independent Developers Pack, ou sexa, un lote de Xbox One con disco duro de 500 GB e mando sen fíos que inclúe como contido adicional 7 xogos de desenvolvedores independentes: #IDARB, Warframe, Jackbox Party Pack, Threes!, Never Alone, Smite e Hand Of Fate.
Sorprende que Microsoft ouse a comercializar lote de Xbox One que opte polos xogos independentes polos mesmo prezo que custaría, por exemplo, con Halo: The Master Chief Collection, aínda que o feito de que esteamos ante un produto que só se vende en liña pode dar a entender que estamos ante un experimento para coñecer mellor a recepción no mercado dos xogos independentes, á vez que aproveitan para salientar o programa ID@Xbox a través do que é posible publicar xogos para Xbox One sen contar coa axuda dunha grande distribuidora.
Polo momento non se sabe se este lote chegará a verse á venda fóra de Australia, e o que si deu bastante que falar sobre esta nova oferta é que, durante unhas horas, na páxina web de Microsoft, apuntábase o feito de que incluía o rumoreado mando de Xbox One con conector estándar para auriculares, pero o detalle foi eliminado da páxina web, posiblemente en espera á presentación oficial do novo mando durante a celebración da feira E3.