Nintendo presenta StarFox Zero xunto con outras novidades

Esta tarde, enmarcado no E3, Nintendo realizou un Digital Event, ou sexa, un vídeo no que amosan algunhas das súas novidades para os vindeiros meses, sendo o máis salientable o anuncio de StarFox Zero, un xogo para Wii U que chegará no último trimestre do ano e que destacará por facer un uso efectivo do GamePad da consola doméstica de Nintendo: no televisor veremos a nave en terceira persoa, mentres que na pantalla do mando aparecerá a acción dende a cabina. O xogo contará cuns controis doados (para facilitar a realización de numerosas manobras sen complexas combinacións de botóns) e conta coa garantía de estar a ser desenvolvido por Platinum Games.
Rechamante resultou o anuncio de que Nintendo se alíe cun dos seus rivais nos xogos que permiten introducir figuras reais dentro dos xogos, de xeito que as figuras amiibo de Donkey Kong e Bowser poderán introducirse en Skylanders SuperChargers (así coma noutros xogos de Nintendo). Estas figuras terán unha base xiratoria para ser compatibles coa base de Skylanders, conservando a compatibilidade co lector de amiibos de Nintendo 3DS e Wii U.
Con certas reminiscencias a The Legend of Zelda: Four Swords, anúnciase un novo xogo multi-xogador de Zelda, The Legend of Zelda: Tri Force Heroes, que permitirá colaborar con outros dous amigos para superar alxubes de todo tipo, tendo que realizar moitas accións cooperativas para poder superar os diferentes retos.
A filtración da semana pasada veuse confirmada, e durante o primeiro trimestre de 2016 teremos Hyrule Warriors, o musou con personaxes de Zelda, en Nintendo 3DS, onde pretende chegar a unha masa de xogadores moito máis ampla que a de Wii U.
Tamén para o ano que vén teremos outro título multi-xogador, desta volta competitivo, Metroid Prime: Federation Force, que contará con diversos modos centrados na acción, na que teremos que enfrontarnos a outros xogadores tanto en local como a través da Internet. Empregará a vista en primeira persoa e centrarse nos elementos multi-xogador.
Nintendo tamén confirmou que traerá a Europa o novo Fire Emblem, levando aquí por título Fire Emblem Fates; e tamén confirmouse que en Europa teremos en decembro o agardado Xenoblade Chronicles X. O xogo Yokai Watch de Level-5 tamén chegará finalmente a Europa, aínda que teremos que agardar ao ano que vén para velo.
Para un público máis amplo amosaron en acción o xogo Animal Crossing: Amiibo Festival, que procurará trasladar a experiencia dos xogos de mesa, e que veremos no último trimestre de 2015.
E como estamos ante unha presentación de Nintendo, non podía faltar Mario, que conta con varios títulos en carteira, como Mario & Luigi: Paper Jam Bros. para Nintendo 3DS (que chegará en primavera de 2016 e sería unha especie de mestura entre Mario & Luigi e Paper Mario), no último trimestro do ano tamén teremos Mario Tennis: Ultra Smash para Wii U, e para completar a oferta de xogos do fontaneiro temos que o 11 de setembro chegará Super Mario Maker a Wii U, permitindo empregar figuras amiibo para engadir disfraces de Mario.

Vídeo co Digital Event íntegro