Activision Blizzard acorda a compra de King

Na xornada de onte Activision Blizzard anunciou que viña de asinar un acordo definitivo de compra (a través das súas subsidiaria ABS Partners C.V.) de King Digital Entertainment por 18 dólares a acción en efectivo, o que supón unha cantidade total de 5.900 millóns de dólares. Deste xeito Activision busca mellorar a súa posición no mercado global do lecer electrónico para móbiles, consolas e ordenadores persoais, agardándose que a operación de compra poida completarse na primavera de 2016.
Deste xeito Activision (editora de franquías como Call of Duty, Guitar Hero, Skylanders e Destiny), que xa experimentou as grandes vantaxes de facerse con Blizzard (desenvolvedores de Hearthstone: Heroes of Warcraft, StarCraft e Diablo), poderá prosperar rapidamente no mercado móbil, onde King xa conseguiu grandes éxitos como Candy Crush Saga e Candy Crush Soda Saga.
Bobby Kotick, director xeral de Activision Blizzard, asegura que “os ingresos e beneficios combinados consolidan a nosa posición como a empresa independente máis grande e rendible do lecer interactivo. Cunha rede combinada global de máis de 500.000 millóns de usuarios activos ao mes, o noso potencial para chegar a audiencias de todo o mundo nos dispositivos que eles prefiran permítenos entregar grandes xogos a audiencias máis amplas que nunca”.