iOS 10 e macOS Sierra estrean beta pública

Tras pasar polas mans de milleiros de desenvolvedores, e ir pulindo numerosos detalles, as futuras versións dos sistemas operativos de Apple, iOS 10 e macOS, chegan finalmente á súa primeira beta pública aberta, de xeito que calquera usuarios de dispositivos e equipos compatibles poden anticiparse ao resto de usuarios e probar xa o que achegarán as novas versións dos sistemas operativos o vindeiro outono, aínda que cómpre salientar que estamos ante versións de proba, de xeito que non se considera seguro o seu uso nos nosos equipos principais, xa que poden ter importantes bugs que impidan o uso de funcións esenciais.
Para instalar iOS 10 Beta precisamos dun iPad 4, un iPad Air (ou superior), un iPad Pro, un iPad Mini 2 (ou superior), un iPod Touch (de 6ª xeración) ou un iPhone 5 (ou superior), mentres que para a beta de macOS Sierra de xeito xeral chegaría con ter un equipo mercado hai menos de sete anos. Os usuarios que queiran probar estas versións de proba deben inscribirse no programa de betas co seu identificador de Apple, podendo abandonarse o programa en calquera momento.