Sony estrea unha liña de televisores 4K que chegará ata as 100 polgadas

A calidade de imaxe nos televisores é unha característica que vai moito máis aló da resolución do seu panel, e para demostrar que aínda se pode avanzar moito para conseguir imaxes de auténtico luxo, conseguindo reflectir a realidade con grande fidelidade, Sony anuncia a serie ZD9 de televisores Bravia HDR 4K, a vindeira xeración de tecnoloxía de pantallas con capacidade de reproducir negros máis intensos, iluminacións máis brillantes e a cor do mundo real.
A nova serie Z supón levar o alto rango dinámico (HDR) 4K a un novo nivel, cun contraste moi elevado e uns cores realistas, que consegue en boa medida grazas a un procesador de imaxe 4K de novo desenvolvemento (o HDR X1 4K Extreme) e a tecnoloxía de retroiluminación Backlight Master Drive (capaz de atenuar e intensificar cada LED de xeito individual). Coa incorporación de tres novas tecnoloxías de procesamento (remasterizado HDR baseado en obxectos, dobre procesamento de base de datos e Super Bit Mapping 4K HDR) leva os contidos de ultra alta definición con HDR a un novo nivel.
Aparte da pantalla, os novos televisores tamén presentan un deseño moi coidado e sofisticado, cunha forma de encerado negro e unha parte traseira que agocha os cables para que o televisor sexa elegante dende todos os ángulos. Tamén integran Android TV para permitir acceder a contidos de servizos en liña, contando tamén cun sistema de navegación de contidos mellorada e busca por voz.
Esta nova gama de televisores verá a luz con modelos de 65 e 75 polgadas dos que polo momento coñecemos os prezos nos EE.UU., que serían de 6.999 e 9.999 dólares respectivamente, e que chegarán ao mercado a finais do verán, estando previsto que a finais de ano chegue tamén un modelo cunha impresionante pantalla de 100 polgadas, do que darán detalles nos vindeiros meses.