A PS4 contará cun par de mandos profesionais con licenza oficial

As competicións de videoxogos profesionais demandan sistemas de control de calidade para que os mandos empregados durante os campionatos non supoñan un atranco, e para atender a esta demanda de mandos de xogo de precisión Sony vén de outorgar licenza a un par de mandos profesionais que chegarán este mesmo ano a PlayStation 4.
Un destes novos mandos sería o Razer Raiju, que presenta unha ergonomía e personalización melloradas con respecto a un mando DUALSHOCK estándar, incluíndo 2 bumpers adicionais e 2 gatillos adicionais extraíbles, panel de control integrado na parte frontal do mando, interruptor mecánico do gatillo e modo de disparo instantáneo para conseguir unha maior velocidade de resposta, 2 perfís personalizados para poder cambiar entre ambos ao instante, conector de aurculares de 3,5 milímetros con control de volume, cubertas de caucho extraíbles para os joysticks que melloran o agarre e un cable USB trenzado de 3 metros (que pode quitarse para facilitar o almacenamento do mando).
O outro mando profesional para PS4 sería o Nacon Revolution, que conta con 2 joysticks analóxicos de 46º de amplitude, 4 botóns de acceso rápido adicionais, cruceta de 8 direccións, 4 perfís personalizados, 2 compartimentos interno con 6 pesas adicionais para axustar o manexo e equilibrio, e un cable extraíble de 3 metros.
Estes novos mandos sairán á venda de cara ao Nadal e cómpre lembrar que optan polo seu uso mediante cable para evitar as interferencias e os retardos que poden padecer os mandos sen fíos, o que sería un problema no medio dunha competición.