Chega a España o casco autónomo de realidade virtual Oculus Go

En outono Facebook presentou un casco de realidade virtual que finalmente chegou ao mercado en maio, pero cunha distribución moi limitada, e finalmente xa o temos en boa parte de Europa, de xeito que xa podemos mercar o casco Oculus Go con 32 GB de almacenamento a un prezo de 219 euros e con 64 GB de almacenamento por 269 euros. A distribución española limítase inicialmente a Amazon e supón unha grande nova para todos os que queren introducirse na realidade virtual sen ter que realizar un grande investimento nin ter que escravizar o smartphone para o goce de experiencias envolventes.
Oculus Go é así un visor de realidade virtual axustable á nosa cabeza, que integra pantallas e altofalantes (aínda que recoméndase o uso de auriculares para unha experiencia máis inmersiva, que permite acceder a un catálogo de máis dun milleiro de xogos e aplicacións de realidade virtual e experiencias en 360 graos, que poden controlarse dun xeito cómodo valéndose dun mando sen fíos con botóns e unha superficie táctil para axudar a trasladar os movementos á realidade virtual.
Cómpre destacar que, aínda que é posible usar o casco con lentes graduadas postas, para unha maior comodidade existen lentes graduadas para Oculus Go que poden instalarse de xeito doado e poden ser un accesorio moi atractivo para os que teñan previsto empregar o casco durante longas sesións.